Видео — Япониялык мугалим кыргызча таза сүйлөп, комуз чертет

Видео — Япониялык мугалим кыргызча таза сүйлөп, комуз чертет

Билим АКИpress - Япония эл аралык кызматташтык агенттигинин (JICA) ыктыярчысы Такуми Какихана Чүй облусунун Кегети айылындагы мектепте 2 жыл иштеген. Бул убакыттын ичинде ал айылдык окуучуларга англис тилин үйрөтүп, өзү болсо кыргызча эркин сүйлөп, комуз черткенди үйрөндү. Өзүнүн мектептеги иши, Кыргызстандагы таасирлери жана кыргыз үй-бүлөсүндөгү жашоосу жөнүндө ал 20-июнда Билим АКИpress сайтына айтып берди.

- Мен Чүй облусунун Кегети айылындагы Өмүраалы Исаев атындагы мектепте 2 жыл иштедим. Бул укмуштуудай кооз жер. Кегети тоонун этегинде жайгашкан. Мен мектепте англис жана япон тилдеринен сабак берип, оригами боюнча ийримди алып барчумун.

- Демек сиз кесибиңиз боюнча мугалимсиз?
- Ооба, англис тили мугалими. Окинавада мен 3 жыл мектепте иштедим. Кыргызстанда мен ошондой эле жергиликтүү англис тили мугалимдерине жардам берчүмүн. Кээ бир маселелерде алар мага жардамдашчу. Ошентип, биз чет тилин үйрөтүү методологиясы боюнча тажрыйба алмаштык. Кегетидеги мектепте 500дөй окуучу менин ийримдеримде билим алышчу. Менин максатым балдарды англис тилине кызыктыруу эле. Ал үчүн негизинен интерактивдүү ыкмаларды колдондум, башкача айтканда, сабакты оюндар аркылуу өткөрчүмүн.

de38a98602b1d7c5be35f42b7e3e7ef5_500_0_0

- Такуми сан, өзүңүз жана өзүңүздүн шаарыңыз тууралуу айтып бериңизчи.
- Мен Окинава облусунан болом, бул Япониянын эң түшүтүк бөлүгү. Бул префектура жүздөгөн кичине аралдарда жайгашкан. Мен Тарама аралчасында төрөлгөм, ал жакта 1 миң 400 эле адам бар. 4 бир тууганмын. Улуу эжем турмушка чыккан. Үйдө ата-энем менен кичүү иним жана карындашым бар. Мектепти аяктагандан кийин 4 жыл Окинава эл аралык университетинде билим алдым.

- Кыргызстан эң биринчи кандай таасирлерди калтырды?
- Бишкекке келгенде абдан чоң шаар деп ойлодум. Анткени, Кыргызстан — бул өнүгүп келе жаткан мамлекет деп уккам, такыр башкача элестеткем. Андан кийин мен Кегетиге бардым. Бул жөнөкөй айыл, бирок мага абдан жакты. Жаратылышы кооз, суусу таза, абасы таза, тоолор… Мен ал жакта жыргап жашадым (күлүп).

- Байкашымча, редакцияга комуз көтөрүп келдиңиз. Сиз аны сувенир катары алдыңыз беле же черткенди үйрөндүңүзбү?
- Комузду өзүм үчүн сатып алдым, аны Кыргызстандын бир бөлүгү катары өзүм менен Японияга алып кетүү үчүн. Бул аспапта ойногонду мен иштеген Кегетидеги мектептин музыка мугалиминен үйрөндүм.

f1516d51d0de0701138cc1c935610dee_500_0_0

- Сиз эмне үчүн ыктыярчылык менен алектенүүнү чечтиңиз?
- Мен дайыма чет өлкөдө жашап, иштеп, балдарга жардам берип, башка маданиятты үйрөткүм келчү. Ошондуктан JICAга билдирме кылтырдым. Мени ыктыярчы кылып бекитишкенде, Япониядан 2 ай кыргыз тилин үйрөндүм. JICA курстарды уюштуруп берди — күнүгө эрте мененки саат 8ден кечки саат 5ке чейин, жалпы 70 күн. Биз, ыктыярчылар, талыкпай окудук, жакшы алып кете алдык деп ойлойм, бирок бизге тил практикасы жетпей жатты. Бишкекке келгенден кийин биз дагы 1 ай тил үйрөнүп, андан соң аймактарга жумушка бардык. Мен кыргыз үй-бүлөдө жашагандыктан, тилди жакшы өздөштүрүп, сүйлөп кете алдым.

- Кыргызстанда сизге баарынан да эмне эсиңизде калды?
- Мен чоң жана сонун үй-бүлөдө жашадым. Үй-бүлө башчысы жана анын жубайы мага абдан жакын болуп калды, мен аларды «ата», «апа» дечүмүн. Алар менен 3 жолу кыргыздардын үйлөнүү үлпөт тоюна бардым. Алардын 4 баласы бар, жаратылышка эс алганы бат-баттан чыгып турчубуз. Үлпөт тойлөр өзгөчө эсте калды. Кыргыздар тойдо абдан көп конок чакырышат экен, бардык туугандарын, досторун. Абдан көңүлдүү болду, анткени көп ыр-бийлер жана сынактар уюштурулду. Мен да бир сынакка катыштым — меймандардан ар кандай буюмдады чогултуу керек болчу. Аягында мага өзүм чогулткан кыздын кийимдерин кийгизип коюшту (күлүп).

Кыргызстанда мен Нарында, Ысык-Көлдө, Таласта болдум. Жаратылышы, тоолору жакты. Бир нерсени белгилеп кетким келет — мен Кыргызстанга балдарды окутканы келип, жыйынтыгында өзүм көп нерсеге үйрөндүм. Тагыраагы, сүйлөшүү көндүмдөрүнө, сыйлоого жана ата-энени ардактоого үйрөндүм. Анан да комузда ойногонду үйрөнгөнүмө абдан кубанычтамын. Мен кыргыз үй-бүлөм менен чогуу тамактанып, манты түйгөндү, лагманга камыр чойгонду үйрөндүм. Алар мага абдан жакшы мамиле кылышчу. Сиз азыр сураганда, бардык жакшы күндөрдү эстеп кеттим.

- Сиз дагы кайсы өлкөлөрдө болдуңуз эле? Сиздин ыктыярчы болуп, үйдөн алыс кеткениңизге ата-энеңиз кандай карады?
- Буга чейин Жаңы Зеландияда болгом. Ал эми 2 жыл ыктыярчылыгым боюнча, атам башында күмөн санап жаткан. Антени, Японияда аталышы «стан» менен бүткөн өлкөлөргө абайлап мамиле кылышат. Ал жактарда тынч эмес деп дароо ойлошот. Бирок мен Кыргызстанда тынч жана коопсуз деп аларды көндүрө алдым. Бирок көптө ишендирдим. Келгениме өкүнбөйм. Жакында кетишим керек, а мен кыргыз жашоомду жана кыргыз үй-бүлөмдү эми эле сагынып баштадым.

Комментарии в ВЫХОДНЫЕ дни и НОЧНОЕ время (с 18.00 до 9.00 по Бишкеку) будут опубликованы после проверки модератором.
Для добавления комментария необходимо быть нашим подписчиком
Видеоматериалдар
Фотоматериалдар
×

up