Илимдер академиясында Комсомолдун 100 жылдыгына арналган илимий-практикалык конференция өттү

Илимдер академиясында Комсомолдун 100 жылдыгына арналган  илимий-практикалык конференция өттү

Билим АКИpress - Бүгүн, 25-октябрда КР УИАда Комсомолдун 100 жылдыгына арналган «Комсомол: убакыт сыноосунан өткөн жол» (Бүткүл Союздук Ленинчил Коммунисттик Жаштар Союзу) аттуу илимий-практикалык конференция өттү.

Иш-чараны УИАнын президенти, академик Мурат Жуматаев ачты. «Комсомолдун ары татаал, ары даңктуу басып өткөн жолун эскерип, белгилөө биз үчүн чоң сыймык. Биздин ал кездеги комсомол жаштарыбыз республикабыздын илимин, маданиятын, билим берүүсүн көтөрүүгө эбегейсиз зор салымдарын кошушкан. Азыркы жаштарыбыз улуу муундар түзүп кеткен илимдин базасын дагы улантып, дүйнөдөгү илимий мейкиндикте өз ордун табат деген ишеничтемин», – деп, Комсомолдун 100 жылдыгы менен куттуктады.

Тарых илимдеринин доктору Акылбек Жуманалиев баяндама жасады. «Совет бийлиги кыргыз коомчулугунда маанилүү роль ойногон. Жаштар Совет бийлигинин алгачкы жылдарында өлкөнү индустриялаштырууга, коллективдештирүүгө салымын кошуп, активдүүлүгүн көрсөтүшкөн. Кыргызстан комсомолу өлкөбүздүн өнүгүшү үчүн зор салым кошкон», - деп айтылат анын баяндамасында.

Иш-чараны уюштуруучулардын бири, тарых илимдеринин кандидаты Аида Кубатова комсомол уюмунун тарыхын лидер Осмонкул Алиевдин мисалында карап жатып, комсомолдордун 20-жылдардын башында саны аз болгондугуна карабастан, агартуу иштерине активдүү катышкандыгын, алар кыргыз тарыхында орду бараандуу экендигин белгиледи.

«Комсомолдун 100 жылдыгын майрамдоонун алдында биз жаштар кыймылынын репрессияга туш болгон лидерлерин эске алышыбыз жана эң негизгиси, ал тарыхтан сабак алып, келечекте комсомол кыймылынын маанилүү жерлерин ар тараптан так жана туура изилдөөнү улантышыбыз керек», - деген пикирин билдирди ал.

Кыргыз Республикасынын Президенттик аппаратына караштуу «Мурас»коомдук фондунун жетекчиси Кыяс Молдокасымов да конференциянын катышуучуларына куттуктоо сөздөрүн айтты. «Комсомол — бул жаштыктын өзгөчө, жигердүү мезгили. Кыргыздын ажырагыс тарыхы. Бүгүнкү күндө ушундай илимий жыйындарда жандуу пикир алышып, комсомолдун баштан өткөн эң бир белгилүү учурларын эскерип, ошолорду кийинки муунга жеткирип турушубуз керек. Себеби эгемендүүлүк мезгилден баштап жаштарыбыз боштукта калды. Жаштарыбызды ошол туңгуюктан алып чыгууда комсомолдун багыттарын колдонсок. Ар дайым ошол кездеги жаштыкты, жигердүүлүктү эстеп турсак», - деп кошумчалады ал.

Конференцияда Кыргызстан комсомолунун тарыхы, Кыргызстандагы жаңы муундар үчүн комсомолдун тарыхый мааниси, жаштардын совет бийлигинин алгачкы жылдарындагы саясий аң-сезимин жогорулатуу, жаштардын миграциялык аспектисинин оң жана терс жактары, бүгүнкү күндөгү жаштардын өлкөдөгү ролу, комсомол коммунизмдин эл аралык фактору ж.б. темалар талкууланды.

Илимий жыйынга Россия кызматташуу өкүлчүлүгүнүн Кыргызстандагы жетекчиси Виктор Нефедов Виктор, дипломатиялык миссиялардын жетекчилери, окумуштуулар, жогорку окуу жайлардын окутуучулары, коомдук ишмерлер, жакынкы жана алыскы чет өлкөлөрдүн аспиранттары катышты.

Иш-чара КР УИАнын Тарых жана маданий мурас институту, КРнын Президенттик аппаратына караштуу «Мурас» коомдук фонду, Комсомолдун 100 жылдыгын белгилөө боюнча уюштуруу комитети жана Ж.Баласагын атындагы Кыргыз улуттук университети тарабынан уюштурулду.

Комментарии будут опубликованы после проверки модератором
Для добавления комментария необходимо быть нашим подписчиком
Видеоматериалдар
Фотоматериалдар
×

up