Германия, Түркияны кыдырып, 4 тилде эркин сүйлөгөн Керемет окууга, жумушка да жетишет (сүрөт)

Жаңылыктар | 17:43, 24-январь 2019 | Жаңыртылган 19:02, 24 январь 2019 | 9 432
Германия, Түркияны кыдырып, 4 тилде эркин сүйлөгөн Керемет окууга, жумушка да жетишет  (сүрөт)

Билим АКИpress үлгүлүү, таланттуу окуучулар жана студенттер менен тааныштырууну улантат. Бул жолку каарманыбыз — Керемет Токтобекова. Ал учурда эл аралык «Ала-Тоо» университетинин синхрондук котормо бөлүмүндө 4-курста окуйт. Мектепте окуп жүргөндө эле активисттердин катарын толуктап, учурда окуп гана тим болбостон, иштеп да жатат.

«Мен 1998-жылы 10-октябрда ата-энемдин окуусуна байланыштуу Москва шаарында жарык дүйнөгө келгем. 2015-жылы Ысык-Көлдөгү З.Бектенов атындагы кыргыз-түрк кыздар лицейин бүтүргөм.

Бул кесипти мен атамдын сунушу боюнча тандап алгам, өзүмө да абдан жагат. Биздин бөлүм тилге жана котормого кызыккандар үчүн абдан жакшы. Биз англис тилинен орус жана кыргыз тилине которобуз. Башында мугалимдер абдан жардам беришет, ар түрдүү которуу методдорун үйрөтүшөт. Бирок ошол эле учурда талап абдан күчтүү, сен дагы аракет кылып окуп, ошол талаптарга жооп беришиң керек. Ар кандай адабий, илимий тексттерди, документтерди, видеолорду, кинолорду жана мультфильмдерди которобуз. Котормонун дагы ар кандай түрлөрү болот. Мисалы жазуу түрүндө, ооз эки түрүндө жана башка. 4-курска чейин котормонун бардык түрлөрүн үйрөнүп, акыркы курста кадимкидей синхрондук котормого өтөсүң. Албетте оңой эмес, бирок кызыгып окусаң эч кыйынчылыгы жок.

Бир гана окуу менен чектелбей, азыркы учурда сабактан тышкары радиодо алып баруучу болуп иштейм. Бул жерде иштеп калышымдын да себеби бар. 2-курсту аяктаганда иштеп көрүүнү чечтим. Жайында үйдө жөн отурбастан өзүмдү башка жактан да сынап көрүүнү кааладым. Апамдын сунушу боюнча радиого барып калдым. Ал жерде башында котормочу болуп, дүйнөлүк кабарлары кыргыз тилине которуп жаттым. Ошол эле учурда радиодогу алып баруучулукка кызыгып баштадым. Мектеп убагында да көптөгөн программаларды алып барып калчумун. Ошол себептен радио тармагында да өзүмдү сынап көрөйүн деп үйрөнө баштадым. Радио десе эле жөн эле сүйлөй берет деп ойлочу экенмин, көрсө мунун да өзүнүн түйшүгү бар экен. Сени көптөгөн угармандар угат, ар бир сөзүңө көңүл бөлүп, кылдаттык менен мамиле жасашың керек. Бул тармакта мени кесиптештерим абдан колдоду. Башында абдан сүрдөдүм, бирок бара-бара эркин сүйлөөгө көнүп кеттим.

Азыр иштеп жатканыма 2 жылдын жүзү болду. Учурда куттуктоо жана шоу программаларды алып барам. Бул нерсе да өзүнчө рахат тартуулайт. Анткени угармандар менен сүйлөшөсүң, аларга жакшы маанай тартуулайсың. Микрофон аркылуу эле жакшы сөздөрдү сүйлөп, көптөгөн угармандарга пайдалуу боло аласың. Бул жумуштан чарчабайсың, тескерисинче, сага энергия берет.

Менин котормочулук кесибим менен алып баруучулук бири-бири менен байланышы бар. Анткени экөөндө тең эл менен байланышта болосуң, эки кесипте тең эркин сүйлөшүң керек. Азыр менин эң биринчи максатым — окуумду ийгиликтүү аяктап, котормочу кесибимдин мыкты адиси болуу. Ал эми келечекте бул эки кесиптин кайсынысын аркалайм, аны убакыт көргөзөт», - деди Керемет келечек пландары тууралуу.

Студент үй-бүлөдө 5 бир туугандын улуусу, 2 сиңдиси жана 2 иниси бар.

«Атам — белгилүү төкмө акын Жеңишбек Жумакадыр. Үйдө баарыбыз атабыз менен сыймыктанабыз. Атабыз бизди эң жакшы окуу жайларда окутту. Биздин келечегибиз үчүн бардык шарттарды түзүп берген. Үйдө тартип катуу, атабыздын айткан сөзү менен жана апабыздын бизге берген тарбиясы менен үлгү алып келебиз. Белгилүү адамдын кызы болуш оңой эмес, анткени сенде чоң жоопкерчилик бар. Ошол нерсеге ар дайым татыктуу жүрүшүң керек. Ата-энеге кызмат кылгандын өмүрү берекелүү жана узун болот. Мени ушул даражага жеткирген ата-энеме өмүр бою карызмын, алар менин бейишим. Мындан ары кандай ийгиликтерге жетсем, бардыгы ата-энем үчүн. Буюрса, татыктуу перзент болууга бардык күчүмдү жумшайм», - деди ал үй-бүлөсү жөнүндө.

«Ысык-Көлдөгү лицейден көп нерсени үйрөндүм. Учурда англис, түрк, орус тилдеринде эркин сүйлөй алам. Учурдан пайдаланып, бардык мугалимдериме ыраазычылык билдирем. Ал жерде окуучуларга бир гана билим жагынан эмес, ар тараптуу тарбия беришет. Окуучунун эмнеге шыгы бар болсо, аны өркүндөтүүгө жардам берип, колдошот.

Мисалы, мен ырдаганды, монолог айтканды жакшы көрчүмүн жана көптөгөн сынактарга катышчумун. Мунун арты менен бизди агай-эжелер Германия, Түркия өлкөлөргө чейин алып барып келишкен. Бир нече шаарларды кыдырып, концерт коюп, Кыргызстанды башка элге таанытканга аракет кылдык. Жер кыдырып, башка элдин маданиятын көрүп, тарыхый кооз жерлерге барсаң дүйнө таанымың өсүп, көп нерсени көрүп-билип калат экенсиң. Бизди ал жактан абдан жылуу тосуп алып жатышты, жакшы коноктошту. Өзгөчө, мага Түркиянын меймандостугу, тамактары абдан жакты. Ар бир жерге конок болуп барганда, дасторконун жазып, түрдүү тамактарды берип жана эстеликке белектерин да тартуулап жатышты. Ар бир барган сайын абдан жылуу сезимдер, көз ирмемдер болуп жатты.

Ал эми Германиядагы элдердин кичипейилдиги жана өлкөнүн тазалыгы суктандырат. Бир дагы таштанды көрбөйсүң. Буюрса, биздин өлкөбүз дагы ушундай өнүккөн мамлекеттердин катарын толуктайт деген ишеничтемин. Ал эми бул ишенич биздин колдо, мындайча айтканда, жаштардын колунда. Жаштар келечектин күзгүсү демекчи, үлгүлүү жаштардан болууга умтулалы», - деп айтып берди Керемет мектептик курагын эскерип.

Жазган: Түркиядагы Кастамону университетинин 3-курсунун студенти НАРГИДА МАЛИКОВА.

Сиз дагы билим тармагындагы ийгиликтериңиз, мектептеги, жогорку окуу жайдагы, бала бакчадагы кызыктуу окуялар, өнөрлүү, таланттуу окуучулар, студенттер, классташтар, активисттер, сүйүктүү мугалимдер тууралуу жана айылдагы жаңылыктарды Билим АКИpress сайтына билдирсеңиз болот.

WhatsApp: 0777 37 46 39

Электрондук дарек: bilim.akipress@gmail.com

Комментарии будут опубликованы после проверки модератором
Для добавления комментария необходимо быть нашим подписчиком
Видеоматериалдар
×

up