Эл аралык Айтматов клубунун сыйлыгына кимдер татыктуу болду?

Эл аралык Айтматов клубунун сыйлыгына кимдер татыктуу болду?

Билим АКИpress - 12-февралда Эл аралык Айтматов клубунун 2016-2018-жылдар үчүн «Адабият, көркөм өнөр жана маданият тармагындагы Эл аралык сыйлыгынын лауреаты» наамына ээ болгондорго жана Коомдук Айтматов академиясына жаңы шайланган академиктерге диплом жана төш белгилерди тапшыруу аземи болуп өттү.

Аталган иш-чара УИАнын Чыңгыз Айтматов атындагы Тил жана адабият институту жана Эл аралык Айтматов клубу тарабынан уюштурулган.

Сыйлык тапшыруу аземине Чынгыз Айтматовдун карындашы Роза Айтматова, СССРдин эл артисти К.Сартбаева, КРнын Эл артисттери Д.Жалгасынова, С.Далбаев, Ж.Сейдакматова жана башка адабият, маданият айдыңындагы инсандар катышышты.

Эл аралык Айтматов клубунун «Адабият, көркөм өнөр жана маданият тармагындагы Эл аралык сыйлыгынын лауреаты» деген наамы төмөнкү инсандарга ыйгарылды:

- Жазуучу Султан Раев — «Топон» романы үчүн;

- Театр жана кино актёру Нурканбек Турсунбаев — Ч.Айтматовдун жана дүйнөлүк классикалык башка чыгармалар боюнча спектаклдерде, фильмдерде мыкты ролдорду жараткандыгы жана маданий-уюштуруучулук ишмердиги үүчн;

- Өзбек Республикасынын Эл артисти Мирзажон Азизов —Ч.Айтматовдун чыгармаларын театр өнөрү аркылуу өзбек көрөрмандарына жеткирүүгө сиңирген көп жылдык үзүрлүү эмгеги үчүн;

- Актриса Анара Сыдыгалиева — Ч.Айтматовдун «Саманчынын жолу» спектаклинде башкы каарман Толгонайдын образын эң жогорку чеберчилик деңгээлде жараткандыгы үчүн;

- Актёр, киносценарист, кинорежиссёр Бакыт Мукул — улуттук театр жана кино өнөрүнө сиңирген көп жылдык үзүрлүү эмгеги үчүн;

- «Учур» театрынын режиссеру жана артисттери Ш.Шейшенов, Б.Асанова, Ч.Мамаев, Н.Копоев, А. Ажыканова, И.Токтокожоева — Ч. Айтматовдун чыгармалары боюнча коюлган «Кыямат», «Жаабарс» спектаклдеринде мыкты образдарды жараткандыктары үчүн.

«Сыйлык ээлерин тандоо оңойго турган жок. Жогорудагы инсандардын чыгармачылыгын атайын комиссия карап чыгып, тандалып алынды», - деди УИАнын Чыңгыз Айтматов атындагы Тил жана адабият институтунун директору, академик Абдылдажан Акматалиев куттуктоосун айтып жатып.

Коомдук Айтматов академиясы 2018-жылы жаңы академиктер менен толукталды. Алар: филология илимдеринин доктору, академик Иса Габиббейли (Азербайжан), филология илимдеринин доктору, профессор Мейлибаев Ахмаджон Мейлибаевич (Өзбекистан), филология илимдеринин доктору, профессор Миннуллин Ким Мугаллимович (Татарстан) жана филология илимдеринин доктору Бакашова Жылдыз Кемеловна (Кыргызстан).

Эл аралык Айтматов клубу 1989-жылы көркөм адабиятты, искусствону, маданиятты, элдин тарыхын жана салт-санаасын, Ч.Айтматовдун чыгармаларын эл аралык илимий, маданий байланыштардын чыңдалышына салым кошуу максатында уюшулган. Клубдун сыйлыгы 1991-жылдан бери берилип келе жатат.

«Айтматов клубунун адабият, көркөм өнөр жана маданият тармагындагы эл аралык сыйлыгынын» алгачкы лауреаттары француз жазуучусу Луи Арагон, казак жазуучусу Мухтар Ауэзов, сүрөтчү, киноактёр Сүймөнкул Чокморов болгон.

Комментарии будут опубликованы после проверки модератором
Для добавления комментария необходимо быть нашим подписчиком
Видеоматериалдар
Фотоматериалдар
×

up