Жаңы имараттарда заманбап талаптарга жооп берген мугалимдер болбосо, мамлекеттин күч-аракети текке кетет, - М.Абылгазиев

Билим АКИpress - Премьер-министр Мухаммедкалый Абылгазиев Чүй облусунун Москва районундагы Мураке айылындагы жана Панфилов районундагы Бухара айылындагы орто мектептердин ачылыш салтанатына катышты. Бул тууралуу өкмөттүн басма сөз кызматы маалымдады.

Өкмөт башчы өз сөзүндө окуучуларды, мугалимдерди жана айыл жашоочуларын Билим күнү жана жаңы мектептердин ачылышы менен куттуктады.

«Билим күнү биз үчүн өзгөчө күн. Ушул күн жашоонун жаңы баскычынын белгиси болуп саналат. Бул Кыргызстандын эли билим берүүгө, балдарга жана өлкө келечегине зор маани берерин айтып турат. Мен силерди өзүмдүн жана президент Сооронбай Жээнбековдун атынан жаңы окуу жылынын башталышы менен гана эмес, жаңы заманбап мектептин ачылышы менен да куттуктайм. Быйылкы жылы өлкөбүздө 1 млн 268 миң окуучуга мектеп эшиги ачылат, алардын ичинде 156 миңи — 1-класстын окуучулары. Бул күн ата-энелер, чоң ата жана чоң апалар үчүн дагы бөтөнчө күн. Себеби алардын ар бири балдары татыктуу билим алса, келечек пайдубалы бекем болсо деп тилешет. Азыркы заманда билим алууга тийиштүү көңүл бурган эл дайыма бакубатчылыкта жана жеткиликтүү жашоодо жашайт. Мектепти аяктай турган жогорку класстын окуучуларына кайрылгым келет. Силер кесип тандоого олуттуу мамиле кылышыңар керек. Анткени бул силердин келечек жашооңорду аныктай турган маанилүү кадам. Адис болуу үчүн силер кадырына карабастан, эмгек рыногунун реалдуу талаптарына көңүл буруп, техникалык адистиктерге маани берсеңер болот», - деди М.Абылгазиев.

Өкмөт башчынын айтымында, бүгүн республика боюнча 15 жаңы мектеп өз эшигин ачты. Андан сырткары, 111 билим берүү объектиси курулууда, жыл аягына чейин дагы 72 мектеп ачылат.

«Бул мамлекет билим берүү тармагына өзгөчө көңүл буруп жатканын айтып турат. Буга жыл сайын 30 млрд сомдун тегерегинде каражат жумшалат. Республика боюнча мектептер курулуп, оңдолуп жатат. Жада калса, алыскы аймактардагы билим берүү мекемелери дагы интернет менен камсыздалууда. Өкмөт мугалимдердин айлык акысын 30%га жогорулатуу үчүн каражаттарды таап жатат. Бирок ушул жаңы имараттарда заманбап талаптарга жооп берген мугалимдер болбосо мамлекеттин күч-аракети текке кетет. Ошондуктан мугалимдер курамы балдар билим алууга умтулушу үчүн квалификациясын жогорулатуу менен алектенүүгө тийиш. Заманбап шарттар чекти жоюуда жана интернеттин жайылышы менен окуучулар шаарларда жана алыскы аймактарда бирдей мүмкүнчүлүктөргө ээ болуп жатышат.

Өткөн жылы жалпы республикалык тесттин жыйынтыгы боюнча жогорку упайды борбор калаадагы гимназиянын эмес, Жалал-Абадагы орто мектептин бүтүрүүчүсү алганы буга далил. Биз ошондой эле окуучулары олимпиадада жеңишке жетишип жана тестте жогорку упай алган мугалимдерди мамлекет тарабынан акчалай сыйлык сыйлоо керек деп эсептейбиз. Өкмөт бүгүнкү күнү бул үчүн канча каражат керектигин деталдуу иштеп жатат. Бул айлык акысын жогорулатуудан тышкары мугалимдер үчүн жакшы өбөлгө болмокчу. Бардык мектептерде балдар туш болууну каалаган, ата-энелер балдарын бергиси келген мугалимдер бар. Мындай мугалимдер көп болушу керек. Дал ушул максатта акчалай сыйлоо маселесин натыйжалуу чечүүгө тийишпиз. Мугалимдик кайрадан беделдүү жана ардактуу кесип болушу абзел», - деди премьер-министр.

М.Абылгазиев сөзүнүн соңунда окуучуларды жана мугалимдерди, ошондой эле бардык чогулгандарды Билим күнү менен дагы бир ирет куттуктап, окуудагы ийгиликтерди, бакыт жана бакубатчылык каалады.

Премьер-министр мектептерге компьютердик класстар үчүн жабдууларды белек кылды.

Комментарии будут опубликованы после проверки модератором
Для добавления комментария необходимо быть нашим подписчиком
Видеоматериалдар
Фотоматериалдар
×

up