«Беш бармак жасап, уй сааганды үйрөндүм», - Ысык-Көлдөгү окуучуларга 2 жыл билим берген япониялык Йошино Миса

Билим АКИpress - Япониялык ыктыярчы Йошино Миса Ысык-Көл райондук билим берүү борборунда 2 жыл эмгектенди. Йошинонун кыргызча аты — Мээрим. Бул ысымды ага Япониядагы кыргыз тили мугалими койгон. Анткени Йошино абдан мээримдүү.

Ыктыярчы Кыргызстандагы 2 жылдык жашоосу, окуучулар менен иштөөсү тууралуу Билим АКИpress басылмасына айтып берди.

«Мен 34 жаштамын. Япониянын Осака шаарына жакын жайгашкан Нара деген жерден болом.

JICA уюму менен келишим түзүп, Чолпон-Ата шаарындагы Ысык-Көл райондук билим берүү бөлүмүндө 2 жыл иштедим. 30 мектепке барып, окуучуларга экологиядан сабак бердим. Сабак өтүүдө мага көп мугалимдер жардам беришти. Окуучуларга Япония менен Кыргызстандын жаратылышы жөнүндө айтып, экология эмгне үчүн маанилүү экендигин түшүндүргөнгө аракет жасадым», - дейт Йошино.

Ал кыргыз тилин кантип үйрөнгөнүн айтты. «Кыргыз тилин үйрөнүү кичине оор болду. Японияда 2 ай, Бишкек шаарында 1 ай окудум. Күн сайын кыргызча сүйлөшкөнгө аракет кылдым.

Ыктыярчы болуума дүйнөнүн маданиятын билип, башка өлкөнүн адамдары менен иштегим келгени себеп болду. Алгачкы жолу бул иш менен алектендим», - деди ыктыярчы.

Йошино окуучулар менен кантип иштегени жана Кыргызстан калтырган таасирлери тууралуу да бөлүштү.

«Мен 1-11-класстардын балдарына сабак өттүм. Дилбаян жаздарчумун, таштандылардан кантип арылуу керектиги тууралуу, жаратылышты кантип таза кармоо керек деген сыяктуу темаларда сабак өтчүмүн. Кыргызстанда көп китеп окуу керек, сүрөт тартып, вмдеокамера менен ишеп, изилдөө жүргүзүү керек деп ойлойм. Балдар менен иштөөдө кыйынчылыктар деле болгон жок. Англис, кытай, кыргыз тилдерин жана кичине орус тилин билем.

Ал эми Кыргызстанга мен биринчи жолу келдим. Тоолору жана көлдөрү мана аябай жакты. Чай ичтим. Нарынга жайлоого барганда кой сойгонду көрүп, абдан таң калдым. Дагы бул жакка келүү мүмкүнчүлүгү болсо, кайрадан Чолпон-Атаны тандамакмын. Абдан жакты.

Японияда деле тоолор, көлдөр бар, бирок бул жактын жаратылышы коозураак экен. Болгону, көчөдө таштандылар көп. Японияга баргандан кийин Кыргызстан тууралуу элдерге айтып, презентация жасайм. Кыргыздардын тамактарын жасаганды, өзгөчө беш бармак жасаганды, уй сааганды үйрөндүм», - деп айтып берди япон ыктыярчысы.

Комментарии будут опубликованы после проверки модератором
Для добавления комментария необходимо быть нашим подписчиком
Видеоматериалдар
Фотоматериалдар
×

up