Ош технологиялык университетинде экономика жана башкаруу факультетинин «Экономика жана финансы» кафедрасы тарабынан экономика багытындагы (Финансы жана кредит профили) адистер үчүн түзүлгөн окуу планынын мазмуну боюнча онлайн вебинар болуп өттү.

Вебинардын негизги максаты – адистиктердин окуу планындагы математикалык, профилдик жана кесиптик компетенцияларынын калыптануусун жана кемчиликтерин иш берүүчүлөр, эксперттердин жана тейлөөчү кафедралардын катышуусунда талдоо болуп саналат.

Бул маселеде кафедра башчысы экономика илимдеринин кандидаты, доцент Марат Зикираев аналитикалык баяндама жасады. Онлайн-вебинарды ОшТУнун ректору, техника илимдеринин доктору, профессор А.Абидов ачып, талкууга ОшТУнун структуралык жетекчилери, тейлөөчү кафедралар жана иш берүүчүлөр катышып, өздөрүнүн ойлорун ортого коюшту. Онлайн вебинарга көз карандысыз эксперттер, коомдук ишмерлер да катышты.

Иш берүүчүлөр азыркы замандын талабына жооп берген адистердин тартыштыгын айтып, керектүү дисциплиналарды окуу планына киргизүүнү сунушташты. Онлайн вебинарда катышуучулар тарабынан ар түрдүү ой-пикирлер айтылып, кеңири талкууланды. Жыйынтыгында, бардык айтылган баяндардын жана сунуштардын негизинде токтом кабыл алынып, тийиштүү структураларга өзгөртүүлөрдү киргизүү боюнча милдеттер коюлду.