Мугалимдер күнүн утурлай: Жылдын мыкты тарбиячысы Жумакан Ажыбаева: Педагог болуу — бала кезимен берки кыялым

Мугалимдер күнүн утурлай: Жылдын мыкты тарбиячысы Жумакан Ажыбаева: Педагог болуу — бала кезимен берки кыялым

Билим АКИpress - Билим АКИpress басылмасы Билим берүү жана илим министрлиги менен биргеликте жаңы «Мугалимдер.kg» рубрикасын ачты. Анда Кыргызстандагы мектептердин жөнөкөй мугалимдери тууралуу сөз болот.

Бүгүнкү биздин каарманыбыз — Жалал-Абад шаардык билим берүү бөлүмүнө караштуу №17 «Каакым» мектепке чейинки билим берүү уюмунун тарбиячысы Ажыбаева Жумакан Мейманбековна. Ал ошондой эле «Жылдын мыкты тарбиячысы - 2018» кароо-сынагынын жеңүүчүсү».

Анын айтымында, тарбиячы менен баланын ортосунда тыгыз байланыш, бири-бирин түшүнүү мамилеси болгондо гана мыкты натыйжа алууга болот. «Менин максатым — ар бир баланын жан дүйнөсүнө сүңгүп кирип, дилин туя билип, алардын көздөрүнөн кубаныч, ишеним алуу жана келечекке болгон кызыгуусун арттыруу болуп саналат.

Ар бир адамдын алдына коюп, көздөгөн максаты болот эмеспи. Менин да балалык күнүмдөн алдыга койгон максатым — педагог болуу эле. Мектепте окуп жүргөн кезимде эле жакшы сабак берген агай-эжелеримдин жолун жолдосом деп кыялданчумун.

Мектепке чейинки курак — адамдын андан аркы өсүүсү үчүн анын турмушундагы эң маанилүү мезгили. Ал курак адамдын гана эмес, бүтүндөй коомдун жетишкендиктеринин жана көйгөйлөрүнүн булагы. Так ушул өмүрүнүн ирмеминде адамдын башка адамдарга болгон мамилеси, инсандык сапаттары, анын мүмкүнчүлүктөрү калыптанат же калыптанбай кала берет.
Акыркы мезгилде мектепке чейинки курактагы балдарды өнүктүрүү маселеси олуттуу өзгөрүүдө жана коомчулук тарабынан билим берүүнүн маанилүү тепкичи катары кабыл алынууда. Ошондуктан менин милдетим жана максатым — инновациялык мамилелерди пайдалануу менен балдарга ар тараптан сапаттуу билим берүү жана балдардын сабакка болгон кызыгуусун артыруу», - деп айтып берди Жумакан Ажыбаева.

Тарбиячынын жазган ыр саптарынан:

«Наристелер жазылбаган ак барак,
Эмне үйрөтсөң, так ошону аткарат.
Мүнүшкөрү саяпкери келишсе,
Шумкар болуп, тулпар болуп тапталат».

Комментарии будут опубликованы после проверки модератором
Для добавления комментария необходимо быть нашим подписчиком
Видеоматериалдар
Фотоматериалдар
×

up