Жалал-Абад мамлекеттик университетинде 10 орто кесиптик жана 8 жогорку кесиптик билим берүү программаларын аккредитациядан өткөрүүгө даярдыктар көрүлүүдө. ЖАМУнун ректору, техника илимдеринин доктору, профессор Кеңешбек Усенов менен «Билим-Стандарт» көз карандысыз аккердитациялык агенттигинин директору Эрик Эсентаевдин ортосунда келишимдерге кол коюлду.
«Сапат» бөлүмүнүн башчысы Гүлдана Токоеванын айтымында, жогорку жана орто кесиптик билим берүү программалары 2019-жылы көз каранды эмес аккредитациядан өтүүгө даярданып жатат. Тендердин жыйынтыгы боюнча «Билим-Стандарт» көз карандысыз аккердитациялык агенттиги жеңип чыккандыктан, агенттик менен окуу жайдын ортосунда келишим түзүлдү. Ошондой эле 2019-жылдын 21-22-январь күндөрү «Билим берүү программаларын аккредитациялоо» программасынын алкагында «Окуу жайдын өзүн-өзү баалоосун өткөрүү» деп аталган семинар-тренинг өткөрүлгөн.
«Семинар-тренингге окуу жайдын факультеттеринен, колледждеринен жана башка түзүмдүк бөлүмдөрдөн 80ден ашык профессордук-окутуучулук курам катышты. Иш-чаранын жыйынтыгында өзүн-өзү баалоо процедуралары боюнча кафедралар пайдалуу маалыматтарга ээ болуп, көз карандысыз аккредитациядан өтүүгө документтерди дайындоодо», - деп кошумчалады Гүлдана Токоева.