Ош мамлекеттик педагогикалык университетинин ректору Бекмурза Зулуев Казакстанда өткөн сынакта байгелүү орундарга ээ болгон окуу жайдын 5 студентин куттуктап, сыйлыктарды тапшырды.

10-ноябрь күнү Алматы шаарында Абай атындагы Казак улуттук педагогикалык университети менен Педагогика жана психология институту тарабынан «Менин кесибим — мугалим» деген темада 7-Эл аралык эссе сынагы уюштурулган. Сынакка жалпы 60тан ашуун студент катышып, катарында ОшМПУнун 1-курсунун 5 студенти 2-3-орундарды багындырышты.

Абдылда кызы Айзадабегим жана Галдыбай кызы Нуриза 2-орунга ээ болушса, Жусупова Нурзаада, Маткасымова Муштари, Мисирова Нурай 3-орунду камсыздашкан.

Иш-чара студенттердин педагогикалык билимин жайылтуу, кесиптик жөндөмдүүлүгүн жана даярдоо сапатын аныктоо, алардын талантын, педагогикалык жана чыгармачылык потенциалын ачуу максатында уюштурулуп, мында дилбаяндар казак, орус, англис тилдеринде гана кабыл алынган.

Жобого ылайык, сынакка «Башталгыч билим берүү», «Мектепке чейинки билим берүү», «Атайын педагогика», «Педагогика жана психология» адистиктеринин 1-курсунун студенттери гана катышкан.