Ош шаарындагы Конфуций институтунун Кытай тарабынан директору Ван Чже Ош технологиялык университетинде болду.

Университеттин ректору, доцент Ж.Турсунбаев менен жолугушуп, эки тараптуу кызматташуулар тууралуу сүйлөшүлдү.

Ван Чженин билдирүүсүнө караганда, Конфуций институту Кытай Эл Республикасынын бир канча жогорку окуу жайлары менен келишим түзүп, Кыргызстан жарандарынын ал жакта билим алуусуна шарт түзүлмөкчү.

Кытай мамлекетинен билим алуу үчүн ар бир каалоочу биринчи кезекте тил үйрөнүүсү керек. Бул үчүн Конфуций институтунда мыкты шарттар каралган. ОшТУ техникалык жана технологиялык багыттагы адистерди даярдагандыктан, студенттер академиялык мобилдүүлүк боюнча Кытай мамлекетинен өздөрүнүн багыттары боюнча билимдерин улантууга мүмкүнчүлүк алышат.

Тажрыйба алмашуу максатында магистранттар, докторанттар жана жалпы эле профессордук-окутуучулук курам үчүн дагы бир нече долбоорлор иштелип чыккан. Бул долбоорлорго ылайык, мындан ары ОшТУ менен Кытай мамлекетинин жогорку окуу жайларынын ортосунда билим берүү максатында иштер аткарылмакчы.