2020-жылдын 22-24-октябрь күндөрү Жалал-Абад мамлекеттик университети жогорку билим берүүнүн 7 багыты боюнча программалык жана институционалдык аккредитациядан өттү.

Аккредитацияны көз карандысыз аккредитациялоо жана рейтинг агенттиги өткөрдү. Эксперттик комиссия материалдык-техникалык базалар менен таанышып, билим берүү процессин уюштуруу, жеткиликтүүлүгүн камсыз кылуу иш-аракеттерине байкоо жүргүздү.

Онлайн сапардын жүрүшүндө окуу жайдын ректору, профессор Кеңешбек Усеновдун жеке интервьюсу, профессорлор, декан, институт директорлору, структуралык түзүмдүн жетекчилери менен интервьюлар өткөрүлдү.

Ошондой эле студенттер, ата-энелер, окутуучулар, бүтүрүүчүлөр, иш берүүчүлөр менен маектешүүлөрдү өткөрүп, окутуучулардын сабактарына катышты. ЖАМУ НААР агенттиги тарабынан белгиленген стандарттарга ылайык даярдалып, жогорку билим берүүнүн 7 багыты боюнча программалык жана институционалдык аккредитациядан ийгиликтүү өттү.

НААРдын жыйынтыктоочу отурумунда окуу жайдын андан ары өнүгүүсү үчүн пикирлер ортого салынып, пайдалуу сунуштар айтылды.